خان ننه هایاندا قالدین بئله باشیوا دولانیم
دا، سنین تایین تاپیلماز سن اولن گون عمه گلدی
منی گوتدی آیری کنده من اوشاق نه آنلایایدیم؟
باشیمی قاتیب اوشاقلار نئجه گون من اوردا قالدیم
قاییدیب باخاندا گوردوم یئریوی ییغیشدیریبلار
نه اوزون و نه یئرین وار خانی خان ننه م سوروشدوم
دئدیلر کی خان ننه نی آپاریبلار کربلایه
کی شفاسین اوردان آلسین
سفری اوزون سفردیر بیر ایکی ایل چکر گلینجه
نئجه آغلارام یانیخلی نئچه گون ائله چیغیردیم
کی سسیم سینم توتولدی او، من اولماسام یانیندا
اوزی هئچ یئره گئدممز بو سفر نولوبدی من سیز
اوزی تک قویوب گئدیبدی
هامیدان آجیخ ائدر کن هامیا آجیخلی باخدیم
سونرا باشلادیم کی من ده گئدیرم اونون دالینجا
دئدیلر سنین کی تئزدیر امامین مزاری اوسته
اوشادغی آپارماق اولماز سن اوخی قرآنی تئز چیخ
سن اونی چیخینجا بلکه گئله خان ننه سفردن
تله سیک، روانلاماقدا اوخویوب قرآنی چیخدیم
کی یازام سنه گل ایندی دخی چیخمیشام قرآنی
منه سوقت آل گلنده آما هر کاغذ یازاندا
آقامین گوزی دولاردی سنده کی گلیب چیخمادین
